La Companhia Lo Pau Lo Tiau
La Companhia paulina Lo Pau Lo Tiau qu’a hèit renàisher las danças ditas de bastons ! En efeit, en 2014, lo grop de 8 dançaires amators acompanhat per musicians professionaus, tots passionats de danças e de musicas tradicionaus deu Bearn, que s’ei format a Pau, dens los Pirinèus Atlantics (64) ! Qu’èm, uei lo dia, hèra mei !!
Bastons colorats en man, la nosta tropa que balha a véder un espèctacle en exterior, ritmat, dinamic e gaujós. Dançaires e musicians, que preneràn plaser a har lo passèri per las arruas e los carreròts de la vòsta comuna, au son de l’acordeon e de las percussions !
La Companhia Lo Pau Lo Tiau qu’ei ua companhia mixta e intergeneracionau. Los escambis que son rics, agradius. La transmission que i ei hòrta pendent las nostas repeticions, que hèm au minimum tots 15 dias, en un ambient seriós e conviviau tà un detzenat de representacions per an.
Las coregrafias que presentam que son, tà la màger part creacions nostas, resultat de las nostas inspiracions collectius deu moment, dab la volontat constanta de valorizar lo repertòri de pas tradicionau gascon, lo noste repertòri commun tan preciós.
Despuish 2016, qu’escambiam las nostas practicas, dab 2 grops aragonés, « San Chusé » de Zaragoza e « Los danzantes de Sabiñánigo », pendent las nostas « encontres de danças pirinencas » annuaus.
Documents Lo Pau Lo Tiau
Tots los documents disponibles.
Fòtos Lo Pau Lo Tiau
Totas las fòtos deus nostes projèctes
Videos Lo Pau Lo Tiau
Totas las videos deus nostes projèctes.
Agenda
Formacion: Las danças gasconas en coble, 24 de seteme de 2023
dab Dany Madier-Dauba e Marc Castanet
Tà dançaires e musicians de tota estetica – Inscripcions abans lo 16 de seteme de 2023
En partenariat dab Le Centre Chorégraphique James Carlès
Las danças en coble que son plan presentas desempuish la mitad deu segle XIX, dens tots los bals en França. En purmèr que son pòlcas, escotishas, valsas, masurcàs. Sus l’espaci occitan e gascon, la manèra de las dançar que varia quitament a l’interior deus petits parçans on las avem encontradas. Uei, los dançaires que s’arrecaptan aquestas variacions tà enriquir la dança e prepausar navèras composicions; lo ròtle deus miaires dens lo coble pòt intercambiar indiferentament.
La formacion que prepausarà d’experimentar aquestas perpausicions tà que cada coble i tròbe lo son estile e la soa expression pròpia.
Dany Madier-Dauba qu’ensenha dab hèra d’estrambòrd la dança tradicionau gascona, en s’emparar sus las recèrcas e collèctas miadas dens l’ACPA (Associacion per la Cultura Populara en Agenés), associacion dont ei cofondatora en 1977. Qu’ei actuaument presidenta de l’associacion Culturas d’Òc en Òlt e Garona, egaument musiciana e cantaira (Duò MadierS, Tastets e Violons de Garona).
Marc Castanet qu’ei vadut a Aush .En 1976, que descobreish la musica e la dança « tradicionaus » occitanas a Samatan. Aqueras descobèrtas que hèn lo ligam dab la lenga occitana qui tien de familha, e qu’estudiarà, puish ensenharà.Que participa en 1979 a la creacion de l’Associacion entà la Cultura Populara en País Gascon (ACPPG) e tanben a la creacion deus grops La Sansonha, Lo Drac. Acòrd Duò Swing, La Confrairia deus Bohaires. Qu’a jogat o que jòga tostemps dab la Companhia Christian Vieussens, Verd e Blu, La Brigada Menestrèrs. Que prepausa tanben bals en sòlo com concèrts on se mesclan contes bilingües e musica.
Las estructuras fondamentaus de la dança collectiu dens los repertòris gessits de la tradicion orau e dens los testimoniatges deus tractats istorics de la dança. 21 e 22 d’octobre de 2023.
En partenariat dab Le Chorégraphique James Carlès
dab Carles Mas i Garcia
Tà dançaires e musicians de totas esteticas – inscripcions abans lo 10 d’octobre de 2023
En partir de la practica concrèta e de la comparason de las fòrmas de la dança collectiu com branlos de la Renaishença, branlo aussalés, sardana, saut, contrapàs… la formacion que serà dirigida cap tà la presa de consciéncia de la metrica deus cicles de movement de la dança collectiu. Que poderam hicar en perspectiva cadua de las fòrmas tradicionaus concrètas com variacion d’ua estructura fondamentau.
Aquera estapa importanta, autant entaus dançaires “tradicionaus” com taus dançaires formats dens las practicas e esteticas de la dança academica (dança contemporanèa, classica, etc…), que’ns permeterà de desvolopar ponts de compreneson e de partatge de vocabulari creatiu enter tots los artistas-practicants de la dança e tanben dab los musicians.
L’objectiu que serà egaument d’integrar utís e estrategias d’analisi en partir de la practica conscienta.
Carles Mas i Garcia, mèste a dançar, istorian de la dança, musician, pedagògue, codirector artistic de la Companyia Xuriach, Barcelona.
Despuish 1975, que desvolòpa ua larja recèrca sus l’interpretacion de la musica e de la dança dens las practicas tradicionaus, atau com sus las honts medievaus e de la Renaishença.
Paulotiau + Bal gascon dab lo trio Delor/Cavallin/Josuèr
Çà i dançar et véder dançar a Pardies !!
Danças de bastons bearnèsas e danças gasconas !
Lo Paulotiau au Clos Nigri en 2021
Yoan Delor, Frédéric Cavallin, Crestian Josuèr
Lo ritme entà la dança, dimenge 19 de noveme de 2023
dab Frédéric Cavallin, bateire e percussionista.
En partenariat dab le Centre Chorégraphique James Carlès
Entà dançaires e musicians de totas esteticas – Inscripcions abans lo 12 de noveme de 2023.
– Elements teorics que seràn evidentament abordats mes lo còr de la proposicion que demora la practica deu ritme de manèra collectiu .
– Tribalh sus la nocion de pulsacion interiora, de contratemps, de petit cicle, de gran cicle, binari, ternari, la polyritmia…..
– L’instrument privilegiat que serà plan segur lo noste còs mes diferentas percussions que seràn disponiblas entà variar los plasers…. Lo monde deu ritme qu’ei vaste, lo de la percussion tanben….. Lo noste quadre de partença que demoraràn los ritmes e danças gasconas.
Frédéric Cavallin que debuta la bateria a 8 ans, qu’estúdia a l’escòla Dante Agostini puish a l’escòla Music’hala de Tolosa, que descobreish las percussions orientaus dab Ali Alaoui, e que segueish l’ensenhament deu jogador de tabla indian Debashish Brahmachari . Que’s passiona entà l’idèa deu «Folclòr imaginari» de Béla Bartok shens encadenassar las soas rasics occitano-italo-espanhòlas.
Que tribalha actuaument sustot dab JUR, Hervé Suhubiette e los Elements, Alain Larribet, Coble, Maël Goldwaser….
